الأربعاء، 14 أكتوبر، 2009

ســـوق الجــواز


عرض للبنات وطلب للرجال
مع رفع شعاراااااااااات
البضاعه المباعه لاترد ولاتستبدل
الشكك ممنوع والزعل مرفوع
واللى مايشترى يتفرج
متضحكوش هو دة حالنا كلنا
الواحد تحب تجوز ازااااى ؟
..فى البداية
عايز احب واتجوز واحدة بحبها هو ينفع جواز من غير حب ويحب فعلا وميعملش اى خطوة ايجابية وتتجوز هى مثلا او تزهق بقة او بمعنى ادق يزهق هو ويستهبل ويقعد ينعى حظة وهمة ويقرر انه هيتجوز من غير حب ...
سؤال مهم انا عايزة اسأل الناس اللى حبت تقدروا فعلا تتجوزوا من غير حب ازاااى ؟؟!! (دة اذا كانوا حبوا بجد اشاسا) ..لان الحب الله يرحمة استشهد من 67 ومخبين علينا :(:(
لما يجى للجد
ماما اختارى لى عروسة ... مواصفاتك ياحبيبى تحبها اية ؟؟ (خضرا وباستك من فوق ياحاجة )
اممممم واحدة مش لازم بحبها او بتحبنى قوى يعنى المهم ميكونش فى حياتها غيرى ( دخلها القفص بقة والعب بيها )ااااممممم احب انها تبقى حلوة مووت ومش مهم لو غبية ( ماكان ماتحطها هتلاقيها يا كابتن وهتطلع وحشة وبتستعبطك ان شاء الله )
امممممم المهم متكونش شخصية وتعمل راسها براسى بقة ( عايز تمثل دور الراجل يعنى عيش ياعم الامور وسهل قووى انها تعمل لك طيبة وعبيطة وفى نفس الوقت تخليك تعمل كل اللى هى عايزاة وكلمتك مش هتنزل الارض ابداااا)امممم طويلة وبيضة ( على اعتبار انهم بيمسكوا القصيرين دة حتى هنيدى بيقول القصيرين اسهل فى التخزين )
اممممم اى حاجة مانا معرفش تبقى فى حياتى واحدة بس لازم حتتين تلاتة ( جوز بنى وجوز اسود و ..)
اممممم واحدة متدينة وعارفة ربنا وبتصلى (وبغض النظر عن البادى والجينز والبزازة قصدى السيجارة اللى فى ايدة)امممممم توافق تتنقب اهم حاجة (مش من تدينة يعنى دة بصمته بس ويقولوا نقبها )
امممممم شعرها حلو وطويل ( عشان ظروف شعره اللى وقع فى الزلزال وهيطلع شعرها متركب )
اممممم حنينة وطيبة ( كان طيب كان حنين )
امممممم واحدة دلوعه كدة وامورة ( اطبطب ادلع نكلم لك نانسى )
امممم واحدة تبقى عارفة واجبات الزوج ( وانت عارف واجباتك ليها )
(كفاية عليكم مواصفات كدة تعبت دة هو ناقصة يسأل على الضمان )
بصى ياماما من الاخر جهزى لى كاااااااام cv ونشوف مين تنفع وادينا بنتفرج
اصحابة المتجوزين يدلون بدلوهم المهم عن تجربة يقولوا له ياواد مش مهم الحلاوة ا لمهم تجوز واحدة ترفعك معاها صيدلانية وتفتح صيدلية مشروع يعنى خليك مفتح ولا عيلة كبيرة ترفعك لفوق اتنصح ولا واحدة ابوها مسافر يسفرك معاه ركزكدة
المصيبة الاكبر انة لما بيتجوز بياخد واحدة مش فيها اى حااااجة من اللى طلبها دة اولا ( يستاهل :P)
اما ثانيا ممكن تيجى واحدة ذكية حبتين تخليها يتجوزها ومفهماه انها ملااااااك و توقعه على عينة وهو فاكر انة سبع رجالة بقة وتطلع الاشكيف ( احسن :P)
ثالثا يروح كل يوم مع ماما يتفرج على واحدة لالالالالالا وصاحبة قالة عندى واحدة تعالى شوفها يروح زميلتة فى الشغل تعالى عندى واحدة يجرى واهو اللى مايشترى يتفرج يا معلم ممكن يروح بيت يتفرج على عروسة وهو حتى ميعرفش دى مين ولا اى حاجة عنهاوممكن يدخل بيت للاسف يطلعوا له كل البنات اللى فية ينقى وفى ناس بيبقى بالمواعيد اكتر من واحدة فى يوم واحد الاولى احلى ولا التانية تفتكروا التالتة (يارب تتزقلح فى قشرة موز )
لغاية ما ربنا يكرم ويدبس فى واحدة تعرف تضحك علية او يرتاح لطيبة تطلع عنية بعد كدة او القسمة والنصيب والمسكينة تاخد الفوكية
والف مبروووووووك لولولولولولولوللىىىىىىىزغروتة حلوة بقة
وعلى فكرة كل دة وممكن تبقى واحدة واتنين وتلاتة قدام عنية وكويسين جداااااااا مش بيفكر فيهم لية عشان دى مش حلوة قوى (وبياخد اوحش منها)
ودى بتفكر كدة وبترد وبتتناقش لالالالالا( وبياخد واحدة بتقف لة على الواحدة )
( دى لالالالالالالا دى جد قوووى ومحترمة بزيادة (وبيتجوز فوزية وتبقى فوزى )
ويقولوا لك جواز صاااااالونات الصالونات والانتريهات متبــــرية منكم
ويقولوا للبنت جاى لك عريس افرحىىىىىى تفرح باية هو جاى لها هى !!!! هو يعرفها ؟؟ هو سمع عن سلعه او يمكن مسمعش كمان قال يتفرج يا يشترى يا بين البايع والشارى يفتح الله
ايوة احنا مفيش قدامنا حلول تانية للجواز ..المفروض دة اللى بيقولوة ..هتجوزوووووا ازاااااااااى يعنىىىىى مفيش الا الصالونات الخربانة دى ودة الصح والصحى لان الجواز المبنى على الحب نسب الطلاق فية اكبر ودى فعلا قد تكون حقيقة فى بعض الحالات لان الكل بيبقى راسم صورة خيالية لحبيبة فبالتالى بيتصدم بواقع مرير انما التانين مش متعشمين فى بعض فبيتحملوا
وادى البنات متلمعين فى البتارين .. بس انت خبط على الباب يا سيدى ومستعدين لتوصيل الطلبات للمنازل لو بس قررت تشترى وياسيدى مش هنختلف بس انت خلصنا منها
دة اللى بيحصل ياقـــــــــوم ايــــــــة رأيكم ؟؟؟
هتقولوا لى مش الكل معاكم بس بيحصل فعلااااااا وانتم عارفين كدة لما بقول لحد الكلام دة بيقولوا عليا مش طبيعية هو انا فعلا مش تبيعية
وعشان كدة هــاعنس
هـــ بكدب
عشان كدة عنــسـت

دة موضوع كتبتة من سنة ونص :( وللاسف الحال بقى اسوء كمان من كدة بكتييييييير السوق بقة كمان الكترونى عبر النت والسوق دخل فية كمان مكاتب وبقى اكتر من 50 مكتب للجواز يعنى الجواز بقى زى مكاتب السفر والهجرة والله مانا عارف هيودونا لفين ؟؟؟!!!؟؟؟؟ للدرجة دى الرجاله واهالينا بيرخصونا يانااااااس ... اروح المكتب ادفع 100 جنية واديهم صورة بنتى عشان نفرج الرجالة عليها وكل يوم تيجى تدفع 10 جنية ونوريك البضاعه وتتفرج وربنا ييسر لكم الحال بقة وتلاقى بنت الحلال او ابن الحلال الكلام فى الموضوع دة عايز موضوع لوحدة هاحاول اسكت :(:( مع انة كتير عليا بجد انى اسكت ... بس خلية موضوع لوحدة بقة وادينى بكلم نفسى :(:(

(واحدة بتشد فى شعرها )

هو حقنا ولا مش حقنا اننا نتعامل زى البنى آدمين ؟؟؟!!؟؟ حقنا ولا مش حقنا اننا نحس بقيمتنا واننا غالين غالين قوى كمان ؟؟؟ حقنا ولا مش حقنا ان اللى يختارنا يختارنا احنا ... يختارنى انا مش يختار باربى عروسة لعبة يلعب بيها ؟؟؟ حقنا ولا مش حقنا اننا نتجوز بكرامة واحنا راسنا مرفوعه بقيمتنا ؟؟؟؟ حقنا ولا مش حقنا انهم يتعاملوا مع عقل وروح مش مجرد صورة للفرجة وبس ؟؟؟!!؟ حقــــ ... اكمل ...؟؟!!؟

بلاش ...

تعبت ...

ويظهر كمان عنست :)

مع السلامو عليكو

ســابرينا





السبت، 3 أكتوبر، 2009

حقها ولا مش حقها ؟؟


السلام عليكم ورحمة الله وبركاتة
خبط فظيع على باب شقة ... واحدة بتجرى تفتح الباب تلاقى رجالة كتيرين بيزقوها وبيزقوا الباب ... وبيقولوا لها فين جووووزك ؟؟ .. ترد خايفة ليه هو عمل اية ؟؟!!؟؟ يردوا ... جوزك من المدونين ياهاااااانم (دى كانت لقطة فى مزلزل )
دة كان كل علاقتى بالمدونات ههههههههههههههههههههه وكل مااسمع عن المدونات افتكر الجملة دى
ولو رجعت بذاكرتى شوية لورا افتكر برنامج شفتة اول مانتشرت حكاية التدوين دى فى مصر لما كانت موضة وكان بيتكلم ان كل شباب الدنيا عملوا مدونات وبيتكلموا معاهم هما مش فاهمين هما عملوها لية اهى موضة وبس
وانا محبش اعمل حاجة لانها موضة وبس لازم يبقى لى هدف منها والا يبقى هروب غير مبرر
ومش بحب النت اشاسا بس النت ايا كان سلاح ذو حدين زية زى البحر ياما نصطاد منة لولو ياما نغرق فية
ليا واحدة صابحتى حوت تدوين وليها مدونات معروفة دلوقتى ماشاء الله كل ماتشوفنى تقولى هية مش هتعملى مدونة بقة تكلمى فيها :( اقولها انااااا ويجى البوليس يقبض عليا ويقولى انتى من المدونين لا ياثتى الله الغنى وبعدين التدوين دة عااااااالم كبير ماليش فية اقول اية ؟؟ واكلم مين؟؟ وبعدين التدوين مش زى المنتديات مثلا المنتديات بتبقى عارفة اللى بيردوا من كتر مابتقرى لهم ويمكن بتقى عارفة الرد وردود الافعال كمان على الموضوع قبل مابتنزلية والرد رايح جاى والكل بيرد وبيتناقش انما فى المدونات الكل بيكلم اللى كاتب الموضوع بس بيبقى الاوحد وانا مبحبش كدة بحب النقاش المفتوح الكل يقول رأية فى كل الاراء المطروحة قدامة لان دة بيفيد الكل وبيفدنى لو انا اللى كاتبة الموضوع
وجت فترة اكتئاب كالعادة مش بكلم حد قلت خلااااااص هاعمل مدونة اصوت فيها مع نفسيتى ولا مين يقرا ولا مين يسمع واهو الواحد يطلع الصرخات اللى جواااة وخلاص ورجعت قلت لاااااا مافينى
وبعدين اتكلمنا انا وبنات اصحابى فى مواضيع كتير وقروا مواضيع انا كنت كتباها فى منتدى قبل كدة فقالوا لية منعملش مدونة نكتب فيها مواضيعك دى ونتكلم فيها عن اى حاجة نحب نوصلها للناس لعبوا فى دماغى اقول اية بس ... الله يسامحهم ويبارك لهم ... وقالت واحدة منا وانا عليا الترجمة هنكتب المواضيع عربى وانجليزى كمان قلت ياسلااااااام كمان اذاعه عربى وانجليزى ولا المترجم الفورى والله ماقصرتى يابنتى سيروا على بركة الله ... وحدفنا نورماندى تو فى البحر وربنا يسترررررررر عليها وعلينا

وجينا للاسم بقة نسمى المحروسة اية ؟؟!!؟؟ وجلسنا نفكر ونفكر .... اممم قلنا اسامى كتير عيب انكم تعرفوها دلوقتى خلاص لان المفروض نذكر محاسن موتنا ...
وبما اننا هنا فكرتنا اننا هنتكلم عن حقوقنا الضايعه او المسلوبة او المسروقة او المنهوبة او ال... كل اللى فى بالنا نقول من حقنا نعيش ولا مش من حقنا ؟؟ من حقنا نتعلم اللى بنحبة ولا مش من حقنا ؟؟ من حقنا نفرح ولا مش من حقنا ؟ من حقنا نحلم ولا مش من حقنا ؟؟ من حقنا نتكلم عن بكرة ولا مش من حقنا ؟؟ من حقنا نغير فى الدنيا ولا مش من حقنا ؟؟ من حقنا نترك بصمة فى الدنيا ولا مش من حقنا ؟؟ من حقنا ....... ولا مش من حقنا ؟؟
ولا لازم نستنى لما روقة تموت زى فيلم العار عشان نطالب بحقها ؟؟؟؟؟؟
ومن هنا كانت حقها ولا مش حقها ؟؟
اللهم اجعلها فى ميزان حسانتنا واجعلها لنا مغنما وليس مغرما يارب العالمين
سابرينا وشركاها